Schlagwort-Archive: reglement

Reglement dil camp/dalla casa

Las fuormas masculinas el text sut valan era per las fuormas femininas.

1. Annunzias

1.1. Tuts interessents  per in camp ston s’annunziar sur nossa pagina d’ internet. Ei il diember maximal da participonts cuntonschius, vegnan las annunzias respectadas tenor la successiun ni tenor criteris fixai ordavon (diember giuvens e giuvnas, contingent da vischnauncas, decisiuns dil survetsch social, interess). Ils organisaturs ein buca obligai da prender tut las annunzias e san renviar participontas ni participonts senza motiv era sche l’ annunzia ei succedida correctamein.

1.2. L‘annunzia vegn confirmada entras il pagament (che sa era esser in aconto). Cun far igl emprem pagament vala la reservaziun sco ligionta ed ils geniturs e participonts van d‘accord cun quest reglament.

1.3. La segirada ei caussa da mintga participont.

1.4. Annunzias san vegnir fatgas entochen il termin publicau silla pagina d‘ internet. Tuts caums dil formular ein da rispunder correctamein. Las datas vegnan duvradas per la correspundenza e vegnan buca currigidas. Indicaziuns fallidas meinan all’ exclusiun dil camp.

1.5. La contribuziun pil camp ei da pagar netto enteifer 30 dis suenter la retschevida dil quen, sil pli tard denton 4 meins avon il viadi el camp per persuans che vegnan annunziadas suenter il termin indicau. Suenter il pagament vala l‘annunzia sco ligionta. Seretila enzatgi pli tard dall‘annunzia vegn la contribuziun restituida sco suonda:

  • entochen fin matg 100 %
  • entochen fin fenadur 50 %
  • silsuenter 0 %

2. Sedepurtar duront il camp

2.1. Il camp entscheiva cul beinvegni alla staziun/entrada el bus il di da partenza. Naven da quei mument valan suandontas reglas:

2.2. Il participont ha da tut temps da suandar las instrucziuns dils menaders.

2.3. En mintga cass astga el buc bandunar la gruppa senza consentiment dil menader, era buca en pliras persunas.

2.4. Il reglament dalla casa d‘albiert ei da respectar en tuts puncts. Directivas dil persunal dalla casa ein ligiontas per tuts.

2.5. Per tuts participonts ei scadin consum d‘alcohol, nicotin ed autras drogas scumandaus.

2.6. Telefons mobils ein da duvrar cun mied e mesira.

2.7. Il ruaus da notg ei da respectar. Suenter il temps indicau dils menaders eis ei scumandau da visitar combras jastras, da far canera en combra ed en zulers aschia ch‘ei disturba anoviars, da schar ir musica dad ault. Sche persunas en combra vulan durmir ei quei giavisch da respectar cun ruaus absolut.

2.8. Mintga participont respecta ils ulteriurs participonts ed auters hosps.

2.9. Mintga participont sedeporta andantamein aschia ch‘ei dat neginas reclamaziuns.

2.10. Giuvnas e giuvens han combras separadas che valan sco sfera privata. Visetas en combras jastars ein buca lubidas. Per sentupar ei da far diever dils plazs publics dalla casa.

2.11. Il temps da durmir ei da fixar aschia che mintga participont sa separticipar al program dil di vegnent senza esser staunchels.

3. Program

3.1. Ils camps ein suttamess allas pleivs dalla Cadi. Consequentamein procura il accumpignader spiritual per temps da meditaziun ed in survetsch divin duront la jamna dil camp al qual tuts separticipeschan.

3.2. Ils participonts separticpeschan alla part culturalla dil camp. Finamira ei d‘emprender d‘enconuscher autras culturas, specialitads dil liug, usits ed attracziuns.

3.3. Las occurrenzas communablas ein obligatorias per tuts. Occurrenzas libras ein facultativas, negin ha denton dretg da restituziun da daners.

3.4. Temps e loghens da rimnada ein ligionts per tuts.

3.5. Ils participonts vegnan parti en gruppas ed ein suttamess ad in menader. La repartiziun da combras vegn medemamein fatga dils menaders.

3.6. Avon il camp dat ei ina sentupada d‘orientaziun obligatoria per tuts participonts. Persunas che fan buca part a quella san vegnir sclaus dil camp.

4. Diversa

4.1. Sche buc auter communicau ei cumpriu el daner da camp: ils viadis, la dimora, las tschaveras (solver, gentar e tscheina) cun da beiber, las excursiun e visetas dallas attracziuns tenor il program. Buca cumpri ein ils cuosts per vivonda sin viadi (partenza da casa tochen alla destinaziun), sortida, basegns individuals, suvenirs, daner da sac, attracziuns ordeifer il program.

4.2.Participonts che setegnan buc vid quest reglament vegnan admoni ina gada. Silsuenter vegnan ils geniturs informai. Gidan quellas admoniziuns nuot, vegn il participont sclaus dil camp cun informar danovamein ils geniturs ed ha immediat da sereneder sin agen cuost e responsabladad dils geniturs a casa.

4.3. Il participont ha per dus onns negin dretg pli da separticipar als camps. Quei vala era per ulteriurs camps che vegnan organisai da Camps Cadi/Giuventetgna Cadi.

4.4. Il participont procura ad uras che sia carta d‘ identitad/pass seigien valeivels.

4.5. Ils menaders surprendan negina responsabladad sch‘enzatgi setegn buca vid quest reglament.

4.6. Sco regurdientscha vegn fatg fotografias e/ni videos davart il camp entras ils menaders ni ina persuna adossada cun quei pensum. Tuts participonts sedeclaran prompts da schar publicar quels maletgs sin la homepage da Camps Cadi/Tür auf – mo vinavon ni en publicaziuns da quellas duas organisaziuns ni dallas pleivs/Vischnauncas participadas. Ils maletgs restan en possess dils organisaturs.

Quest reglament passa en vigur per l‘emprema gada cun ils camps 2004. Adattau la davosa gada:

Mustér, ils 19 da fenadur 2016
Camps Cadi 2